Hver Íslendingur sóar 90 kg af mat á heimili sínu árlega

Matvælastofnun Sameinuðu þjóðanna áætlar að um þriðjungi framleiddra matvæla á heimsvísu sé sóað. Matarsóun er umfangsmikið vandamál sem snýr ekki aðeins að sóun matvæla heldur einnig sóun á fjármunum og auðlindum jarðar auk þess að hafa í för með sér mikla losun.

Á síðastliðnu ári framkvæmdi Umhverfisstofnun ítarlega rannsókn á umfangi matarsóunar á Íslandi, þar sem 90 heimili og 80 fyrirtæki tóku þátt. Samkvæmt niðurstöðum rannsóknarinnar má áætla að matarsóun í neysluhlekk virðiskeðjunnar sé um 132,5 kg. Þar af eru 90kg sóað á heimilum sem er sambærilegt því sem þekkist í öðrum Evrópulöndum. Þá eru um 42 kg sóað í heild- og smásölu, veitingasölu og á spítölum og hjúkrunarheimilum.

Rannsóknin náði til sóunar á nýtanlegum mat, ónýtanlegum mat, vökva og matarolíu. Dræm þátttaka framleiðslufyrirtækja í rannsókninni gerði það að verkum að niðurstöðurnar endurspegla bara neysluhlekk matvælakeðjunnar, þ.e.a.s. heild- og smásölu, veitingasölu og spítala og hjúkrunarheimili. Sjá skýrslu hér.

Tafla 1. Samantekt niðurstaðna á umfangi matarsóunar heimila 2019

Tafla 2. Samanburður á matarsóun innan mismunandi hlekkja virðiskeðjunnar, á mann á ári og heildarsóun á Íslandi á ári, árið 2019