Niðurstöður rannsókna frá árinu 2019 leiddu í ljós að jarðvegur á Heiðarfjalli í Langanesbyggð er mikið mengaður. Umhverfisstofnun fékk það verkefni að gera fleiri rannsóknir á svæðinu og setja upp viðeigandi merkingar.

Tveir starfsmenn frá Umhverfisstofnun sinntu mikilvægu eftirliti og ráðgjöf við hreinsunarstarf vegna olíuleka á Suðureyri. Þar láku um níu þúsund lítrar af olíu úr tanki við kyndistöð Orkubús Vestfjarða

Umhverfis-, orku- og loftslagsráðuneytið úthlutaði Umhverfisstofnun 545 milljónum kr. til uppbyggingar innviða og náttúruverndar á ferðamannastöðum. Geysissvæðið í Haukadal fékk stærstu einstöku úthlutunina, rúmlega 152 milljónir kr., fyrir gerð göngustíga.

Miðbærinn á Selfossi hlaut Svansvottun, en um var að ræða stærsta einstaka verkefnið sem hlotið hefur Svansvottun hér á landi, enda tekur hún til 13 bygginga sem samtals eru 5500 fermetrar.

Fyrsta vatnaáætlun fyrir Ísland var staðfest af umhverfis-, orku- og loftslagsráðherra. Vatnaáætlun felur í sér stefnumörkun um vatnsvernd og aðgerðaáætlun fyrir 2022-2028.

Þingholtsstræti 35 varð fyrsta íbúðarhúsið sem hlaut Svansvottun fyrir endurbætur. Húsið er á þremur hæðum og stendur í einum elsta hluta Reykjavíkur.

Landsskýrsla um losun gróðurhúsalofttegunda á Íslandi fyrir árið 2020 kom út. Skýrslan sýndi nokkurn samdrátt í losun einkum vegna Covid-19 heimsfaraldurs.

Fyrsti Loftslagsdagurinn fór fram í Hörpu 3. maí. Þar komu fram sérfræðingar úr ýmsum áttum og fjölluðu um loftslagsmál á mannamáli. Þátttaka í viðburðinum fór fram úr björtustu vonum.

Íslenskir þátttakendur í viðskiptakerfi ESB með losunarheimildir (ETS) gerðu upp heimildir sínar fyrir losun ársins. Heildarlosun innan ETS kerfisins fyrir árið jókst um 7% frá fyrra ári.

Umhverfis-, orku- og loftslagsráðherra staðfesti friðlýsingu svæðis í Þeistareykjahrauni sem geymir einhverja heillegustu og tilkomumestu hraunhella sem þekkjast hér á landi og þótt víðar væri leitað.

Gígur, nýtt sameiginlegt húsnæði Umhverfisstofnunar, Vatnajökulsþjóðgarðs, Landgræðslunnar og Náttúrufræðirannsóknarstöðvarinnar í Mývatnssveit (RAMÝ) á Skútustöðum í Mývatnssveit var opnað.

Umhverfisstofnun, Landhelgisgæsla Íslands og Samgöngustofa héldu árlega mengunarvarnaæfingu sína. Markmið mengunarvarnaæfingarinnar var að æfa samskipti á milli viðbragðsaðila og þjálfa starfsmenn viðkomandi aðila í notkun mengunarvarnabúnaðar.

Í tilefni sjómannadagsins bauð Umhverfisstofnun til sýningar á Grandagarði þar sem hægt var að fræðast um olíumengun í sjó og viðbrögð til að lágmarka áhrif olíumengunar á lífríki.

Teymi efnamála fór í fræðsluátak um PFAS efni og útivistarvörur í sumarbyrjun.

Stöðuskýrsla um fráveitumál fyrir árið 2020 kom út. Staðan hefur lítið breyst síðan árið 2014 en tækifæri eru til úrbóta eftir að ríkið samþykkti styrkveitingu til sveitarfélaga vegna fráveituframkvæmda.

Handbók um framkvæmd úrgangsstjórnunar kom út. Handbókin er vegvísir sveitarfélaga í úrgangsmálum sem fjallar um þær stefnumótandi ákvarðanir og þjónustu sem sveitarstjórnum eru faldar samkvæmt lögum nr. 55/2003 um meðhöndlun úrgangs

Frávikum í eftirlitum með endurvinnslu og upplýsingagjöf á raf- og rafeindatækjum, rafhlöðum og rafgeymum fækkaði. Það bendir til þess eftirlitið hafi skilað árangri og að framleiðendur hafi bætt úr merkingum, móttöku og upplýsingum um flokkun og skil.

Skrifað var undir viljayfirlýsingu þess efnis að Þjóðgarðurinn Snæfellsjökull verði hluti af fyrsta UNESCO Man and Biosphere svæði á Íslandi á Snæfellsnesi.

Umhverfisstofnun sá um skipulagningu Norrænu vatnaráðstefnunnar í Reykjavík dagana 30. ágúst til 1. september. Ráðstefnan er samstarfsvettvangur fyrir norræna aðila sem sinna innleiðingu vatnatilskipunar.

Umhverfisstofnun, Orka náttúrunnar, Verkís og Landbúnaðarháskóli Íslands stóðu fyrir vinnustofu fyrir náttúrumiðaðar lausnir fyrir vatnavistkerfi.

Efnasprotafyrirtækið Gefn fékk fyrstu íslensku Svansvottunina í flokknum viðhaldsvörur fyrir farartæki. Fyrirtækið fékk einnig fyrirtækið vottun í vöruflokknum hreinsiefni og fituleysir fyrir iðnað. Gefn þróar tækni sem umbreytir úrgangi og útblæstri í umhverfisvæna efnavöru.

Umhverfis-, orku-og loftslagsráðherra undirritaði stjórnunar- og verndaráætlun fyrir Geysissvæðið að viðstöddum forsætisráðherra og starfsfólki Umhverfisstofnunar. Svæðið er eitt þekktasta goshverasvæði jarðar og var friðlýst 2020.

Bráðabirgðaútreikningar Umhverfisstofnunar sýndu að losun gróðurhúsalofttegunda á Íslandi jókst um 3% milli áranna 2020 og 2021 þegar er horft til losunar án landnotkunar og skógræktar (LULUCF). Ef litið var einungis til losunar á beinni ábyrgð Íslands nam aukningin 2 prósentum milli ára.

Blikastaðakró-Leiruvogur var friðlýst og landverðir buðu upp á stefnumót við almenning á friðlýstum svæðum á Degi íslenskrar náttúru.

Umhverfisstofnun gaf út nýjar leiðbeiningar til aðstoðar við val á fráveitulausnum og umhirðu en töluverð þróun hefur orðið á fráveitulausnum og ýmsar leiðir í boði sem eru betri fyrir umhverfið.

Umhverfisstofnun og Samband íslenskra sveitarfélaga efndu til ráðstefnu. Markmið ráðstefnunnar var meðal annars að fjalla um leiðir sem sveitarfélög hafa í úrgangsstjórnun og hvernig þau geta undirbúið sig fyrir breytingar á úrgangslöggjöfinni þann 1. janúar 2023.

Umhverfisstofnun gaf út leiðbeiningar fyrir sveitarfélög og heilbrigðiseftirlit þar sem farið er yfir þær mismunandi kröfur sem gerðar eru til hreinsunar á skólpi.

Umhverfisstofnun gaf út leiðbeiningar fyrir fyrirtæki í landinu um ábyrga plastnotkun og stóð fyrir opnum fyrirlestri um ábyrga notkun plasts undir yfirskriftinni: Allt í plasti!

Umhverfisstofnun stóð fyrir vinnustofu um leiðir til að koma öllu rusli sem kemur upp með veiðarfærum í land. Þátttakendur í vinnustofunni voru aðilar sem hafa hlutverki að gegna við úrgangshirðingu í hafi, móttöku á úrganginum og förgun.

Ný reglugerð um skráningarskyldan atvinnurekstur tók gildi samkvæmt lögum um hollustuhætti og mengunarvarnir. Reglugerðin gildir um 47 atvinnugreina og kveður á um skráningu atvinnurekstrar í miðlæga rafræna gátt í stað starfsleyfisskyldu.

Fulltrúar Umhverfisstofnunar tóku þátt í COP 27, Loftslagsráðstefnu Sameinuðu þjóðanna, í Sharm El Sheikh í Egyptalandi. Þær sátu meðal annars samningafundi um sameiginlegt losunarbókhald.

Í aðdraganda jóla fór Saman gegn sóun í vitundarvakningu um ofneyslu og mótvægisaðgerðir til að draga úr henni. Ofneysla er dýrkeypt fyrir umhverfið og henni fylgir stress og álag.

Skýrsla um vistfræðileg viðmið við ástandsflokkun strandsjávar á Íslandi út frá líffræðilegum og eðlisefnafræðilegum gæðaþáttum kom út. Tilefnið var innleiðing á lögum um stjórn vatnamála nr. 36/2011.

Þátttakendur Grænna skrefa voru boðaðir á morgunfund á Grand hótel Reykjavík. Á fundinum var farið yfir stöðuna á verkefninu og niðurstöður ánægjukönnunar. Þar voru fjögur fræðsluerindi flutt og allir tóku þátt í skapandi hópavinnu um grænu vegferðina.

Guðlaugur Þór, umhverfis-, orku- og loftslagsráðherra afhenti Hörpunni Svansleyfi fyrir ráðstefnuþjónustu. Umsóknarferlið gekk hratt og örugglega og var mikill hugur í starfsfólki. Með Svansvottuninni styrkir Harpa enn frekar stöðu sína og samkeppnishæfni sem ráðstefnuhús á heimsmælikvarða.

Ráðstefna aðildarríkja Sameinuðu þjóðanna um líffræðilega fjölbreytni fór fram í Montréal í Kanada. Fulltrúar frá Umhverfisstofnun, Náttúrufræðistofnun Íslands, umhverfis-, orku- og loftslagsráðuneytinu og matvælaráðuneytinu tóku þátt í ráðstefnunni.

Umhverfisstofnun og Matvælastofnun gáfu út leiðbeiningar um flokkun úrgangs frá flugvélum og skipum í alþjóðlegri umferð. Fram að þessu hafði rekstraraðilum verið gert að brenna allan úrgang frá millilandaumferð.

Ríkisstofnanir og stofnanir í meirihluta eigi ríkisins héldu áfram að stíga Græn skref árið 2022. 177 stofnanir taka nú þátt í verkefninu og 47 hafa klárað öll 5 skrefin. Allt í allt voru 254 skref stigin á árinu.