Ný þjóðgarðsmiðstöð á Hellissandi
Þjóðgarðsmiðstöð fyrir Snæfellsjökulsþjóðgarð var opnuð formlega þann 23. mars 2023 á Hellissandi. Við þetta tækifæri fékk þjóðgarðurinn nýtt merki og nafni þjóðgarðsins breytt í Snæfellsjökulsþjóðgarð (var áður Þjóðgarðurinn Snæfellsjökull).
Nýja þjóðgarðsmiðstöðin var opnuð formlega í mars 2023
Guðlaugur Þór Þórðarson, umhverfis-, orku- og loftslagsráðherra, opnaði húsnæðið formlega en einnig voru viðstaddir fyrrverandi umhverfisráðherrar sem komið hafa að verkefninu.
Við opnunina skrifaði Guðlaugur Þór undir nýja stjórnunar- og verndaráætlun fyrir þjóðgarðinn.
Starfsfólk þjóðgarðsins ásamt ráðherra: Mandy Nachbar, Guðmundur Jensson, Eva Dögg Einarsdóttir, Rut Ragnarsdóttir, Guðlaugur Þór Þórðarson, Hákon Ásgeirsson og Páll Marel Jónsson.
Lyftistöng fyrir samfélagið
Þjóðgarðsmiðstöð á Hellissandi er lyftistöng fyrir ferðaþjónustu og samfélagið allt á Snæfellsnesi. Þar hafa farið fram tónleikar, ráðstefnur og ýmsir viðburðir sem efla menningar- og fræðasamfélagið.
Í þjóðgarðsmiðstöðinni er gott kennslurými til að taka á móti skólahópum á öllum stigum. Rými er til staðar fyrir tímabundnar sýningar um sögu, listir og vísindi. Þá er einnig minjagripasala, veitingasala og tímabundin skiltasýning sem fjallar almennt um þjóðgarðinn.
Í þjóðgarðsmiðstöðinni er gott kennslu- og sýningarrými.
Ný sýning í vinnslu
Framundan er vinna að sýningu sem mun höfða til breiðs hóps, jafnt heimafólks sem innlendra og erlendra gesta. Sýningin mun bjóða upp á leiðsögn um mannheima, náttúruna og dulræna heima í fylgd þjóðsagnapersónunnar Bárðar Snæfellsás. Gert er ráð fyrir að sýningin flæði fallega um rýmið, gefi svigrúm fyrir tímabundnar sýningar og aðra menningartengda atburði. Sýningin er hönnuð af Kvorning Design og Yoke frá Danmörku og Verkstæðinu frá Íslandi sem áttu vinningstillögu í hönnunarsamkeppni um sýningu í þjóðgarðsmiðstöðinni. Áætlað er að sýningin opni haustið 2024.
Arkís arkitektar hönnuðu bygginguna sem er þrískipt.
Umhverfisvottuð bygging
Þjóðgarðsmiðstöðin er fullhönnuð og byggð út frá alþjóðlega umhverfisvottunarstaðlinum BREEAM
Hönnuðir þjóðgarðsmiðstöðvarinnar voru Arkís arkitektar sem unnu hönnunarsamkeppni árið 2006. Byggingin skiptist í þrennt:
- Til suðurs er Jökulhöfði, sem vísar í Snæfellsjökul sem trónir yfir húsinu
- Til norðurs er Fiskbeinið sem vísar til fengsælla fisikmiða á svæðinu
- Í gegnum húsið liggur svo Þjóðvegurinn en hægt er að ganga þvert í gegnum húsið að innan sem utan
Í Snæfellsjökulsþjóðgarði starfa 6 heilsársstarfsmenn og yfir sumarmánuði starfa fjórir til fimm landverðir þar að auki.